ආයුබෝවන්!

අප්පුගේ ‘උස කතා’ (Appu’s Tall Tails) වෙබ් පිටුව ට පිවිසෙන සියලු මිතුරන් සාදරයෙන් පිළිගනිමු.

අප්පු කියන්නේ අපේ ගෙදර සිටින කලු පාට බළලෙකි. අප්පුව මට මුණගැසුනේ 2016 අගෝස්තු මාසයේ උදෑසනක කවුරුන් හෝ පාරේ අතරමන් කර ගොස් සිටියදී ය. එවිට අප්පුගේ වයස සති 02ක් පමණ විය. මට හමු වන විට අප්පු ඉතා කුඩා හා දුර්වල ය. අප්පු සමග අප්පුගේ සහෝදරියක් ද විය. ඒ ගුඩියා ය. මම මේ දෙදෙනාව ම ඇති දැඩි කළේ කුඩා බෝතලයකින් එලු කිරි පොවා ය.

වයස මාස 8 දී ගුඩියා අසනීප වී මියගියා ය. ඉන් පසු ගෙදර සිටි කම්මැලි පුෂීන් අයියා හා ගෙදරට ආ අනිත් සියලු බළලුන් ද සමඟ අප්පු ඉතා සතුටින් හැදී වැඩුනේ ය.

අප්පු විශේෂ චරිතයකි. අප්පු 50% ක් හොඳ ය. අප්පු පිට බළල්ලු සමඟ රණ්ඩු කරන්නේ නැත. රස්තියාදු ගහන්න යන්නේ නැත. කුඩා බළල් පැටවුන්ට හිතවත් ය. හිංසා නොකරයි. හොරෙන් නොකයි. අප්පු කන්නේ බළල් කෑම විතර ය. වෙන කිසි ම කිසි දෙයක් අප්පු කන්නේ නැත. දුන්නත් “එපා. ස්තූති යි”, කියයි.

නමුත් අප්පු පණ්ඩිත ය. නිතරම කියවයි. හැම දේකටම හොස්ස පොවයි. ඕප දූප සොයයි. ඒවා එහෙට මෙහෙට කියයි. එක දෙක කර කතා පතුරුවයි. කෙන්ද කන්ද කරයි. ඇනුම් පද කියයි. බොරු කිය යි. කිසි ම හේතුවක් නැතුව අපව හපයි. අපව ලැජ්ජාව ට පත් කරයි. ගෙදර සුනඛයා ට බනී. නමුත් අප්පු ට කවුරුත් බොහො ම ආදරේ ය.

අප්පුගේ නීත්‍යානුකූල නම Black Berry ය.
පසුව එය Black වී ඉන්පසු BB විය. චූටි පූස් යනුවෙන් ද කාලයක් හැඳින්වුනි. ඒ මුල් ම කාලයේ ය. නමුත් එය තවම භාවිතයේ පවතී.
පසුව ලොකු මහත්තයා ලඟ ලියන අප්පු කෙනෙක් වශයෙන් රැකියාවට ගිය පසු, ඇල්. අප්පු වූ අතර පසුව ඇල් හැලී, අප්පු, අප්පු ම විය.

අප්පු සමඟ ඕනෑ ම බළලෙක් සුහද ය. ගෙදර අනිත් බළල්ලුන් ව දමාගෙන කන පිට මැර බළල්ලු ද අප්පු සමඟ හිතවත් ය. ඒ කෙසේ දැයි අපි නොදනිමු. අප්පු ඕනෑම මනුස්සයෙක් එක්ක ද යාලු ය. ඕනෑම කෙනකුගේ අතට යයි. අතගාන්න, වඩාගන්න දෙයි. සමාජ ආශ්‍රය ට ඉතා ම කැමති ය.

මේ වෙබ් පිටුව අප්පුගේ ය. මෙහි සඳහන් සියලු දේ සත්‍ය හෝ සත්‍ය සිදුවීම් ඇසුරින් ය. නමුත් අප්පුගේ සිංහල ඒ තරම් ම නිවැරදි නැත. මෙහි දැක්වෙන්නේ අප්පු කතා කරන විදිහ ය. අප්පුගේ වචන ය. එබැවින් වැරදි තිබුනොත් “අනේ මේ අපේ අප්පු කැටේ නේ ද…”කියා ඒවා කරුණාවෙන් නොසලකා හරින්න. නැතහොත් මට දැනුම් දෙන්න.

අප්පු ට ආදරය කරන ඔබ සියලු දෙනා ට ස්තූති යි.

මීට ලොකු මහත්තයාගේ ලොකු දුව